Паводле даных Белгідрамета, у Брагіне і Лельчыцах паветра прагрэлася да 31,7 градуса цяпла. Ранейшы максімум пратрымаўся 25 гадоў (31,6 градуса ў Брэсце).
У Брагіне лакальны экстрэмум перавышаны на 0,3 градуса (31,4 у 2014 годзе), у Лельчыцах — на 0,9 (30,8 у 2003-м).
Між тым на выходных у Беларусь прыйшоў навальнічны фронт, які валіў дрэвы і шкодзіў маёмасць.
Па дадзеным МНС было зафіксавана 176 выпадкаў падзення дрэў. У Магілёўскай вобласці “зафіксаваныя пашкоджанні інфраструктуры і прыватнай маёмасці”, парушалася электразабеспячэнне ў трох населеных пунктах і на 23 трансфарматарных падстанцыях.
“Падраздзяленні МНС здзейснілі тры выезды для ўборкі паваленых дрэў: два выпадкі — у Клічаўскім раёне, адзін выпадак — у Магілёўскім раёне. Пацярпелых у гэтых інцыдэнтах няма”, — адзначаецца ў паведамленні ведамства.
У Брэсцкай вобласці з-за непагадзі пацярпелі Брэсцкі, Маларыцкі, Пінскі і Ганцавіцкі раёны, пашкоджаны дах 21 дома. Таксама ў рэгіёне ўстаноўлена 27 фактаў падзення дрэў. 142 выпадкі падзення дрэў зафіксавана ў Гомельскай вобласці.
Заяўляецца аб ліквідацыі наступстваў непагадзі ў Мінску і Мінскай вобласці.
У ноч на панядзелак моцная навальніца абрынулася на Мазыр і ваколіцы. Вецер пашкодзіў дахі дамоў, лініі электраперадач, паваліў дрэвы.
Учора ўвечар у Столінскім раёне маланкай забіла маладога мужчыну і параніла дзяўчыну, паведамляе Smartpress. Яны былі ля вадаёма ў момант навальніцы.