Гэты незвычайны крок быў ажыццёўлены кампаніяй Colossal Biosciences, у якую сам Брэдзі калісьці інвеставаў, як піша The Guardian.
Луа, метыс пароды пітбуль, памёр у снежні 2023 года. Брэдзі і ягоная сям'я загадзя падрыхтаваліся да кланавання: узор крыві Луа быў узяты яшчэ да ягонай смерці.
«Я вельмі люблю сваіх жывёлінаў, яны значаць для мяне і маёй сям’і надзвычай шмат. Некалькі гадоў таму мы супрацоўнічалі з Colossal, якая выкарыстала іх бязбольную тэхналогію кланавання праз просты аналіз крыві нашага старога сабакі перад тым, як ён памёр», — падзяліўся Брэдзі, дадаўшы, што кампанія «дала ягонай сям’і другі шанец».
Ён падкрэсліў, што Джуні «не навуковы эксперымент, а паўнапраўны член сям’і».
Тэхналогіі і кошт
Брэдзі выказаў надзею, што аб’яднанне тэхналогій Colossal і нядаўна набытай ёю кампаніі Viagen дапаможа як сем’ям, якія страцілі любімых гадаванцаў, так і праектам па выратаванні рэдкіх відаў.
Colossal, заснаваная ў 2021 годзе, вядомая сваімі маштабнымі праектамі па «дэвыміранні» — адраджэнні шарсцістага маманта і птушкі дадо.
Viagen Pets and Equine, якую набыла Colossal, ужо займалася кланаваннем хатніх жывёл для знакамітасцяў, такіх як Барбара Стрэйзанд і Пэрыс Хілтан. Кампанія мае ліцэнзіі ад Інстытута Рослін у Эдынбургу, дзе ў 1996 годзе была створана авечка Долі.
Кланаванне сабакі праз Viagen, як сцвярджаецца, каштуе ад $50 000 да $85 000.
Сам Том Брэдзі — сяміразовы чэмпіён Супербоўла і цяперашні каментатар тэлеканала Fox Sports.