Гэтае рашэнне мае выправіць шматгадовыя экалагічныя парушэнні і адрадзіць унікальную экасістэму рэгіёна.
Працы па аднаўленні русла вяліся з чэрвеня па 15 жніўня. Іх ініцыявалі навукоўцы з Нацыянальнага парку «Белавежская пушча» і Інстытута эксперыментальнай батанікі.
Асноўная мэта — ліквідаваць наступствы прамысловай дзейнасці канца XIX стагоддзя, калі Нараўку ператварылі ў прамы канал для сплаву драўніны. Лес з Белавежскай пушчы, які лічыўся адным з найлепшых для суднабудавання, ішоў на экспарт.
Гэтае ўмяшанне, а таксама меліярацыя, прывялі да сур'ёзных экалагічных праблем: узровень вады ў рацэ знізіўся на 1,5 метра, парушыліся ўмовы жыцця для многіх відаў птушак і жывёл, пачаў усыхаць рэліктавы лес.
Вяртанне Нараўкі ў старое рэчышча павінна аднавіць прыродны гідралагічны рэжым і дапамагчы адрадзіць біяразнастайнасць на гэтым участку пушчы. Агульная даўжыня ракі складае 61 км, з якіх 21,7 км праходзіць па тэрыторыі Беларусі.