Дарагія нашы чытачы — выжывальшчыкі ў свеце кліматычных змен, аматары шматразовых торбачак і героі хатняга сартавання!
Рэдакцыя Зялёнага партала шчыра віншуе вас з Калядамі і надыходным Новым годам.
Мы ведаем, што 2025-ы быў годам «са званочкам»: то паляванне на мядзведзяў дазволілі, то вецер дрэвы ламаў, то тэрмометры зашкальвалі. Таму ў 2026-м мы жадаем вам не толькі ўстойлівага развіцця, але і сапраўднага чалавечага шчасця з экалагічным прысмакам.
Вось нашы рэдакцыйныя пажаданні:
Трымаць баланс. Жадаем вам устойлівасці, як у самага лепшага баланс-борда. Каб нават калі жыццё падсоўвае вам замест валіка цэлае бервяно, вы стаялі ўпэўнена і з усмешкай.
Сартаваць без стрэсу. Няхай у новым годзе сартаваць смецце будзе прасцей, чым сартаваць навіны ў стужцы. Жадаем, каб у вашым жыцці заставаліся толькі «карысныя фракцыі», а ўвесь таксічны бруд сам сабой адпраўляўся на перапрацоўку гісторыі.
Быць як пчолы (але разумней). Жадаем вам заўсёды знаходзіць свае «астраўкі бяспекі». І каб ніякія знешнія «пестыцыды» ў выглядзе дэдлайнаў і дрэннага надвор’я не псавалі вам настрой і не збівалі з маршруту да кветак вашай мары.
Энергаэфектыўнасці. Каб ваша ўнутраная энергія была на 100 % аднаўляльнай! Каб вы не «гарэлі» на працы, а свяціліся ад задавальнення. І каб ваш асабісты КПД быў вышэйшы, чым у сонечнай панэлі ў ліпені.
Цішыні і спакою. Паколькі салюты зараз пад забаронай, жадаем вам атрымаць асалоду ад сапраўднай цішыні. Няхай адзінымі гучнымі гукамі ў навагоднюю ноч будуць выбухі смеху і радасныя воклічы «Вау, гэта што, веганскія дранікі?!»
І галоўнае: няхай межы вашага асабістага шчасця толькі пашыраюцца, і ніякі «савет міністраў» вашага лёсу не зможа іх паменшыць!
Заставайцеся з намі, чытайце пра важнае і памятайце: планета ў нас адна, а вось падстаў для дапамогі і добрага стаўлення адзін да аднаго — безліч.
З Новым годам! Зялёнага вам святла ва ўсіх пачынаннях!